حياة كيبورديه ®

آزول فـلاون ~

تخيـلوا معايـا إن الحيـاة بسيطــﮧ كبساطــﮧ الكيبورد اللي قدامك

آي شي تبيــﮧ ما عليك إلا أنك تضغط الأمر ويكون الوضع منتهـي

على سبيـل المثـال آمـر » Enter

وهو أكثر أمر معروف ع الكيبور ، وتضغط عليــﮧ لما تكون على وشك آنجاز شي معين

يعني خلاص كل شي تمام ومستني منك الأوكي

ويا سلام لو عند كل واحد فينا Enter وبمجرد ماتضغط عليــﮧ كل حاجــﮧ تتحقق

ممكن تعدي على باب أي أمانــﮧ وبعد ما يطلعلك نافذة » خاطرك تشتغل في شنو ؟

طبعاً حيكون في قائمــﮧ بجميع الوظائف

Computer » تم اختيار مهندس

للتأكيد اضغط إنتر

- إنتر

Computer »

هل أنت متأكد إنك تبي تكون مهندس ؟ أصل شكلك مش شكل مهندس بكل

- أما إنك جهاز سامط .. هيـا أنت بتكسد عليا ولا نعدي نشوفلي واسطــﮧ ؟

Computer » غير بشويـا وأنت ساخن حنشغلك بس للتأكيد مره آخرى آضغط أنتر

- إنتر

Computer » مبروك أنت توا باش مهندس أد الدنيا - الجهاز فيــﮧ عرق مصري -

لو الوالدة قاعدة جنبك خليها تطلقلنا صغروتــﮧ

أو لو واحد مزال في الكليــﮧ وهو والقرايا مش أصحاب

يضغط أول أنتر يعدي أول سنــﮧ .. ثاني أنتر يعدي ثاني سنــﮧ

يعني الهندسة حتقعد بـ 5 أنترات والطب بسبعــﮧ

بس لو أنتر عصت معاك معناها حتعود السنــﮧ


» Delete

الآمر إللي يحذف

لو خاطرك تنوض من الغيبوبــﮧ وتنسى إنك عايش في ليبيـا

خش ع الهارد متاعك ودير ديليت لكل الملفات اللي عندك اللي فيها شي على ليبيا

ولو مزال عندك أمل خش على سلــﮧ المحذوفات وديرshift delete

وبعد ما تنسي آضغط F5 عشان آدير ريفريش وعييييييييييش

وبعيداً عن الدليت ، في حقيقــﮧ علميــﮧ مش عارف ليش نحنا مش قادرين نستوعبوهـا

إن مفيش أمل في ليبيــا طول ما عمو سُمعى قاعد فيهـا وفروجــﮧ مزال ما روح ..


» Alt F4

الآمـر هذا لو فيــﮧ أي شاشــﮧ قدامك يسكرهـا

يعني لو أنت مديون لصاحبك أوالمحل إللي على أول الشارع أو جـارك

واتفقوا كلهم آيزروك على أول الشارع متخفش خليك في مكانك

أول ما يقربوا منك آضغط Alt F4 الشاشة إلي قدامك بالناس إلي فيها حتسكر

بس لو عصت معـاك يبقى في الحالــﮧ هذي الجري نص الجدعنــﮧ


» Cut - Paste

وهذا طبعاً أشهر آمر نستخدموا فيــﮧ ع الجهاز وممكن تستخدمه في الحقيقــﮧ

لو أنت مصبي في الشارع وطحت في موقف محرج وتمنيت أنك تختفي

لا لا لا .. متعرقش وتجيب ميــﮧ من فوق ومن تحت

خش على الفولدر متاع الشارع و دير لروحك Cut

وبعدين شوف أنت تبي تودي روحك في أني فولدر

لو تبي تعدي للحوش آفتح الفولد متاع الحوش و خش عليــﮧ آضغط Paste حتلقي نفسك جوا


» Copy - paste

الأمر هذا شور الجنس اللطيف

ممكن تستخدمــﮧ في الحقيقــﮧ لما يكون وراهـا شغل وبالذات لما يكون عندهـا بيبي صغير

العيل يبكي يبي يرضع أو عاملهـا على روحــﮧ

- هي المهمهات طبعاً عندهم خبرة و يعرفو العيل يبكي على شنو من أول نظره -

والغدا ع النـار وبنــﮧ الشياط بدت تفوح

والتليفزيون فيــﮧ مسلسل والحلقــﮧ الأخيرة باديــﮧ , وتبي تموت عشان تشوف الحلقــﮧ هذي

وراجلهـا قاعد جوا في الدار وناقم ع الوضع

ما تسكتي العيل هذا راهو نعدي نحطــﮧ لكي على باب أول جامع

وبعدين نحنا في العصر والغدى مزال ما طاب

باهي خلي عندك دم وآعزقيلي حاجــﮧ نمزمز بيهـا على ما الغدى طاب

- غدا من يا حسن ، عليك و ع العشاء -

آهدي وآرخي روحك ومتعصبيش ديري لروحك كوبي وبعدين حطي نسخــﮧ قدام الغاز

ونسخــﮧ قدام البيبي ونسخــﮧ قدام التلفزيون ونسخــﮧ قدام راجلك ويستحسن يكون معاها ساطور

آين توفات ~