يا ليبيا المقهوره ....بين البنات و الكارطة والكوره .... ضاعوا شبابك

الشاعر نعيم الزوى يقول :

يا ليبيا المقهوره ....بين البنات و الكارطة والكوره .... ضاعوا شبابك

جيل انســــيه
جيل انتهى ماخـــــــير تلقى فــــيه
لايحترم روحـــــــه ولا والــــــــــديه
ولا يعد ربى شايـــــــفه بالـصــــوره
فالــعيب طايــــــح مرتمى بــــــيديه
ناسى الله او طلــــــته وحضــــوره
ايدير الخطــــا ويعيش فـــــارح بيه
وما يندرى اللى صــار من مخسوره
يالــيبيا انســـــــى اعبـــــــاك عليه
ألجــيلك حفــــرنا من زمان قـــبوره

جيل تــــوارا
وسط الحشيش اليوم راح اخسارا
عندا القهــــــــاوى مسكنه ودياره
وتمت الشيشه حرفــته او صيوره
لاهــــدف لا طمـــوح فى مشوارا
واخــــذ الدنيا لـــعب فى منظـوره
جاهـــل وضـــــايع ما سمع لدبارا
والقــــلب ميت فيه طافــــى نوره
يلزم علــينا نوقـــــفوا ابـــــجدارا
من كثر ما زايد الحـــال اخطــوره

ولكن رد الشاعر : رجب الشيخى
بأن البطاله كانت هى السبب
وقال :

غـصـبـاً عـنـهــم
م الـوقـت يانـعــيــم مـاهــو مـنـهــم
اسـبـاب واجـده ياصاحـبي كـادنهـم
لا شـغـل لا تعـلـيــم جــاب الـدوره
ذكرت العـيـوب اذكـر اللي خلـنهـم
ايديـروا افـعال اليوم مو مـشـكـوره
في نـاس شـاخـوا بـدلـوا مسكـنـهـم
وفي ناس خط الفـقـر تزحف شوره
لا اهـناك مـن ينـشـد عـلـيهـم كنهـم
ولا الـشـاب مـن يهــتـمـلـه بامـوره
وما من اللي اظروف الحيا جبرنهم
نـاس واجـده لافـعـالـهــا مـعــذوره
في ناس تـلـقـا انـظاف في معـدنهـم
والـكـل فيهـم عيب مـوش ضروره
لو بـغـيـرهـم ياصاحـبي اتـقـارنهـم
في حالـهـم ماهـم اصحاب خطـوره

حلوه بلكل اصلي
والله قصيده ملأخر صحيييييييييييييت
خاصه الثانيه عجبتني بلكل
وين يا خاش بقوه هكي توا
تاكل علينا الجو

حاجه قوية و اصلية بكل يا اصلي
منور عليها

صحيتى قشعرانى انتى ومايكل امنوره واااااااااجد
امنورينى

قصيده من الأخر والله

فعلاً بين البنات والكارطه والكوره

بس أنا منقبلش الطوره لكت معلش

أمنور أصلي

فعلاً أنتا أصلي

قصيدة قوية بكل بكل
وسمحة بكل
يسلمووووو اصلي

اصلي والله اصلي.

حتى القصيده اصليه.

امنور يا أصلللللي.

صحيت اصلي

قصيدة حلوة وقوية بجد