ثلاثيـــــــــــــات ليــبيـــة

ثـــــلاثيــــــــات ليــبيـــة
ثلاثة يتمناهم الليبيين: السكن في طرابلس ... والعلاج في تونس ... والوصول لسن التقاعد.

ثلاثة ما تحلمش بيهم : السفر للسياحة ... وتصيف مع عايلتك ... وكأس العالم في ليبيا.

ثلاثة صعب نتخلى عنها : الماء ... والهواء ... والبازين .

ثلاثة لازم نتخلى عليهم : التفنيص ... والتلقيح ... والسؤال عن المخطط .

ثلاثة تسبب الإحباط : الواسطة ... و الديون ... والمنتخب الليبي .

ثلاثة يرفعوا الضغط : الملح ... وزحمة المرور ... والعيل كان عشش .

ثلاثة تسبب الغرور : الفيلا ... والهمر ... وبدلة الحرس البلدي .

ثلاثة مايحبوهمش الليبيين: التعليم ... و المصريين ... والشبشب المقلوب.

ثلاثة ما يرقدوش الليل : المديون ... والخانب ... وواحد نايضة عليه السوسة .

ثلاثة شبه اختفوا من ليبيا : الدلاع الطويل ... واحترام الشيابين ... والفراشية .

ثلاثة ما تحسش بطعمتهم الا في ليبيا : شاهي العاله... وامبكبة على الحطب ... والبورديم .

ثلاثة تدعو لهم بالهداية : البلعوط ... والمحسدي ... واللي يشجع في نادي الوحدة.

ثلاثة ما تستغربهمش في ليبيا : واحد قاص السريع على رجليه ... وواحد يسوق في الاتجاه المعاكس ... ومتعين وعمره عامين.

ثلاثة تتمنى ما تتصبحش فيهم : سواق افيكو مستعجل ... وطابور طويل في الشيل ... ومديرة المدرسة وفيدها عصا.

ثلاثة ما تعرفش أمت تخشلهم : السجن ... والمستشفى ... ومكب القوى العاملة.

ثلاثة ما ليهمش معنى إلا في ليبيا : العسلوز ... والزميطة ... والعصبان .

ثلاثة ربي يفكك منهم : مجاري مفتوحة ... وكلب مطلوق ... ورشادة طايشة .

ثلاثة إيديرو فيهم الليبيين بس : الهروب من الأحمر... والدفال على رأس بمبلي الغاز ... وتنفيض فرشة الماكلة(البخشة) من الروشن.

,,,ههههههههههههههههه

معاك حق العراب ,,

هذه ثلاثيات ليبية ,, ومتلقاهاش الا عندهم ,,,

وفي حاجات واقعيه مؤلمه ,, زي التعيين وعمره يومين ,,

......بس مشكور

حاجات صقع بكل

مشكورة أوتي على مرورك الرائع ، الموضوع نور بيك

ههههههههههههههههههههههههه

موضوع مضحك و واقعي في نفس الوقت

منور عرررراب

النور نورك مايكل شكرا على المرور الطيب